كان وسيم الي ان تكلم

ايوه.. الو .. الو .. يا قنديل أزيك يا أخويا الصوت بيروح ويجي ..إحنا كويسين .. إيه مش سمعاك خالص طب بص أنا بخطب لعزايم وعند العروسة دلوقتي ...لا لا بنت ناس محترمين وطيبين قوي ..كتر خيرك يا قنديل هي في حجم شمعه بنت أزهار ...سلامتك يا غالي .... مع السلامة .
خير يا ست أم عزايم ؟؟ أمي تسأل
دا قنديل أخويا بيكلمني من السعودية يا ست أم جميله وبيسأل عشان يجيب للعروسة عبايه وهو جاي .
أمي : يجي بالسلامة
والله دا علي اعتبار إني خلاص وافقت وهتخدوني معاكو وانتو ماشيين ( أنا في سري )
ضحكت لحماتي أم عزايم قائله : يجي بالسلامة يا طنط
أم عزايم:تؤتؤتؤتؤتؤ طنط أيه قوليلي يا أمه أنتي ذي بنتي برضة
أبتسم قائلة :حاضر يا أمة
أم عزايم:شايفه طالعه من بؤك حلوه أزاي ايوه كده دا إحنا هنبقي أهل، ونظرت لأمي قائله: أستأذن أنا بقه يا أم جميلة وبكره أجيب عزايم يشوف العروسة.
أمي: تشرفي في أي وقت بيتك ومطرحك يا أم عزايم
.................................
أمي: أما يا أبو جميله متعرفش الست دي طيبه أد إيه أرتحت لها أووي.
أبي: المهم جميله يا حجة.
أمي: هي بنتك بيعجبها العجب موقفه حال المراكب السايرة.
أبي: كل شئ نصيب يا أم جميلة.
أمي وأبي في حوار خاص وكالعادة بستمع خلسة ...
وتاني يوم في الموعد المحدد .. عزايم قاعد مربع إيده وينظر للأرض افتكرته نام لقيت أمي بتنبهي : شايفة الأدب والاحترام شايفه الأخلاق
أرد بإعجاب :لا هو من ناحية أخلاق فهو أخلاق وسيم وطول بعرض ..
والله يا بو جميله من ساعة ما شفت الآنسة جميله معاك وأنت بتصلح العربية قلت هي دي مرات أخويا .( الأسطي شفيق أخو عزايم )
أبي : ربنا يبارك فيك يا اسطي شفيق
أم عزايم : متخلي العرسان يكلمو مع بعض شويه يا أبو جميلة دا بعد إذنك طبعا
أبي : آه .. طبعا طبعا.
أيه الواد الأمور دا ( أنا بس في نفسي ) قاعد مربع إيده برضه وساكت وبعدين أبدء أنا بقه الكلام وخلاص
جميلة : أزيك يا أستاذ عزايم .
عزايم: بخير يا آنسه جميلة.
جميلة: نورتنونا النهارده
عزايم : الله يخليكي دا نورك
ويسود صمت لفترة لأبدء من جديد متسائلة : هو أنت دراستك إيه ؟
عزايم : دراسة إيه يا أستاذه هو العلم بيأكل عيش ؟
جميلة :نعم !
عزايم : أنا كنت في الدبلون بس مكملتش
جميلة: يا أهلا وسهلا
عزايم: أنا كنت بحب الدراسة بس الشغل أحسن
جميلة : آه طبعا
عزايم : طب أديكي معاكي شهادة أهو عملتي بيها إية ؟
جميلة : ولا حاجه .. علي رأيك معاك حق.
عزايم : خلينا في المفيد
جميلة: خلينا
عزايم :أنا قولت لأخويا إنك مش هترضي بيا عشان معاكي شهادة بس قالي معتش فرق هو حد لاقي عرسان اليومين دول ولا أيه؟
جميلة : أيه ؟ هههه ...... آه طبعا حد لاقي
عزايم:أنا من عيله ميكانيكيه أصلا دي الشغل الأساسي بتاع عيلتنا بس أنا الحمد لله ربنا كرمني وإشتغلت سواق في شركه ومرتبي فوق 700جنيه .
جميلة : ما شاء الله ربنا يكرمك ويزيدك.
عزايم :بصراحة أنا كمان أبن بلد و أفهم في الأصول ومحبش مراتي تشتغل ولا تخرج من بيتها غير معايا طبعا
جميلة : آه حقك طبعا
عزايم : وشهادتك بقه , يفكر قليلا محدثه نفسه هتعملي بيها إية ؟ ثم ينظر الي مكملا حديثه : إبقي نفعي بيها العيال عيالنا يعني!
جميلة : آه طبعا!!!
عزايم : بصي يا آنسه جميلة
جميلة: بصيت .
يكمل حديثة : طالما أمي وأخويا إرتحولك فأعتبري إني موافق .. أتشاوري مع الجماعة بقه وابقوا ردوا علينا .
جميلة : حاضر
كان وسيم إلي أن تكلم .. صحيح المرء مخبوء تحت لسانه , كنت في حاله من الدهشة بصراحة هو وسيم وأمور وبيشتغل كل دا كويس، بس التعليم ..........!
أمي :متعقديش الدنيا، ناس كتير متعلمة ومعاها شهادات عملوا بيها إيه يعني
جميلة : والله .. معملوش بيها حاجه ،أمال كنت بتعلم ليه بقه
أمي : بلاش فلسفه خايبه .. عريس حلو وأبن ناس
أنظرلأبي : تكلم يا بابا ساكت لية.
أبي : هما كويسين يا جميلة يا بنتي
جميله : يعني عادي أتجوز واحد معهوش شهادة عشان حلو وكسيب.
أبي : مبدئيا الناس موافقين علينا قرروا عشان نرد عليهم .
أمي : موافقين
جميله : مش موافقة وكفاية تأخدي قررات بالنيابة عني . ثم قمت مسرعه الى غرفتى ولم أستمع الى اى كلام فى هذا الشأن
..............................
بعد أسبوعين ،،
أبي: الناس اتصلوا يا بنتي وعاوزين يجوا, هما كويسين أنا سالت عليهم .. سيبناكي براحتك تفكري
جميله: يجو منا كلامي مالوش لازمة
أبي: بارك الله فيكي وإذا كان علي التعليم مش مشكله المهم إنة بيشتغل .
جميله : ماشي .
...........................
وتدخل ام عزايم مهلله ببعض الزغاريد .... سلام عليكم أزيك يا أم جميلة
امي : أهلا يا أم عزايم أتفضلي يا ختي
ام عزايم : أزيك يا عروسه اللهم صلي علي النبي قمر 14.
أمي : أهلا وسهلا
أم عزايم : تعالي يا عزايم متكسفش أدخل.
أمي : سلمي علي الأستاذ عزايم يا جميلة
أسلم بخجل : أهلا وسهلا أتفضل
عزايم : أهلا يا آنسه جميلة
أم عزايم : إحنا بنفهم في الأصول وبصراحة يشرفنا نسبكم وجايين نتفق معاكوا وتحت أمركوا في كل إلي تطلبوه .
أبي : الله يخليك يا ست أم عزايم الأمر لله وحده .
أم عزايم مكملا حديثها:أنا ربيت ولادي علي الأصول بعد وفاه أبوهم كنت أب وأم ربيتهم رجالة.
أمي : ماشاء الله ربنا يخلي ويبارك...
ينهض الاسطي شفيق مقبل رأس أمه ويهم عزايم لتقبيل يدها .... و ستنهمر دموعي قريبا
أم عزايم :بعد أذن ابو جميلة عزايم يقعد مع العروسة ....
أبي :موافق ...
وها أنا مره أخري هو مختلف ليه المرة دي عن المرة إلي فاتت (بقول في نفسي ).... بدء الحديث المرة دي مباشراً.
عزايم : أزيك يا آنسه جميلة ؟
جميلة : بخير الحمد لله .
عزايم : البلد حالها مقلوب من بعد الثورة والدنيا هايصه في بعضها .
جميلة : أنت ضد الثورة ؟
عزايم : آه طبعا ثوره إيه يا أستاذه دا شويه عيال ولاد... مالهمش أهل الله يخرب بيتوهم الثورة دي جت علي الغلابة إلي زينا!
جميلة : أنا مع الثورة علي فكره وشاركت فيها
عزايم :نعم! شاركتي فيها إذان يعني؟ رحتي التحرير يعني ولا إيه؟!!!
جميلة : ايون
عزايم : لا والله أنتي بتتكلمي بجد ولا بتهزري
جميلة : بجد جدا
ثار وماج ..لا يا أستاذه إستني يا أماه متتفقيش علي حاجه الله يرحمك ياباه مشفتش مرات إبنك كانت في التحرير
أم عزايم : تحرير إيه يا وله إلي بيجي في التليفزيون ؟
عزايم : آه يا أمه، قال إيه كانت في التحرير
أم عزايم : داهية توقف حالهم بتوع التحرير دول
أمي تحاول تهدئة الموقف :بس استهدي بالله كده يا أم عزايم .
الكلام دا بجد يا أم جميله ؟ أم عزايم بتسأل
أمي ترد: و فيها إيه يا ختي ؟
عزايم :يالا يا أماه، فرصه سعيدة يا حج .. قال تحرير قال
جميله : انتو واخدين علبه الجاتوه في إديكو تاني؟!
أم عزايم :أيوه يا ختي إحنا أولي بيها .
.................................
أمي : كده انبسطي طفشتي الناس وأرتحتي ؟
جميله : هو أنا عملت إيه ؟؟
أمي: بيتقوليلة كده ليه وتزعليه؟
أبي : استهدي بالله يا أم جميله صحتك مش كده
جميله : ازعله !!!! ينفلق مع السلامة
أبي : كويس انهم مشيوا لأني أحب جوز بنتي يكون معاه شهادة محترمه زيك كده ..
جميله : بجد !! يعني مش زعلان يا بابا ؟
أبي في حنان : أبدا أنا تهمني راحتك ..
أمي : حد لاقي عريس ذي ده طول بعرض منك لله يا جميلة مش هتفرحيني في حياتي أبدا .
جميله : كل شئ نصيب يا ماما